精選十齣末日電影

hkhk1024

本文章最後由 popo0121 於 2012-12-4 17:13 編輯

資料來源: http://movies.hk.msn.com/%e7%b2%be%e9%81%b8%e5%8d%81%e9%bd%a3%e6%9c%ab%e6%97%a5%e9%9b%bb%e5%bd%b1

轉貼內容如下:

2012 (2009)

呢齣係打正招牌話「演繹」瑪雅文明末日傳說嘅電影，太陽風暴加劇令地心溫度急速上升，地震、火山爆發、海嘯、地磁變動侵襲全球。場面可觀，劇情和科學邏輯合理性算吧啦！

《明日之後》The Day after Tomorrow (2004) 台灣片名:明天過後

同《2012》同屬 Roland Emmerich導演作品，佢真係好沉迷末日大場面。全球暖化暖暖吓變咗冰河時期北半球短時間內全面冰封，燒書取暖嗰幕家下諗起都想笑。

《絕世天劫》Armageddon (1998) 台灣片名:世界末日
  
一舊德州咁大嘅殞石即將撞擊地球造成末日浩劫，NASA無乜橋底下掟咗班鑽油佬上去爆石......I mean爆開舊石，等佢同地球擦身而過。片中莉芙泰勒好靚女，娛樂性亦十分豐富，Aerosmith唱嘅主題曲勁好聽。

《世紀戰疫》Contagion (2011) 台灣片名:全境擴散
  
新型病毒席捲全球，群醫束手，社會秩序漸漸崩潰，到好幾個月後先有疫苗同療法，但係人類已經付出沉重代價......電影星光熠熠但拍攝手法呆板，睇時令筆者不斷諗起 SARS時期，講真十分唔舒服。

《28日後》28 Days Later (2002)  台灣片名:28天毀滅倒數

丹尼波爾嘅傑作，喪屍病毒襲擊英倫，除咗四個生環者之外全英國人變晒喪屍，求生路漫漫......片中將倫敦拍到死城咁，視覺效果極震撼。

《地心浩劫》The Core (2003)  台灣片名:地心毀滅

話說某日地球核心突然越轉越慢，一班精英科學家搭乘配備超強激光技術嘅鑽探車深入地心，引發核爆令地球重新轉動。

《生人勿近》Dawn of the Dead (1978)  台灣片名:活人生吃

George Romero導演嘅經典作，喪屍突然空群而出襲擊人類，少數生環者被困商場要利用其中嘅物資逃生，近年大熱電視遊戲《Deadrising》基本上係將呢條橋原封不動直接拎嚟使。

《天煞：地球反擊戰》Independence Day (1996) 台灣片名: ID4：星際終結者

又係 Roland Emmerich導演，經典科幻電影。外星人處心積慮，突然大舉入侵多個主要城市，地球人處於捱打狀態。直到駕駛戰機參戰嘅美國總統發現外星人弱點，率領全人類大舉反擊，喺美國獨立日（七月四日）打敗外星人云云。電影當年低成本但全球大收，並且奪得當年奧斯卡最佳視覺效果獎項。當然大美國主義同「天才」劇情亦一直為人「津津樂道」。

《太陽倒數》Sunshine (2007) 台灣片名:太陽浩劫

原來呢齣英國電影只係幾年前嘅作品，唔知點解感覺好似好舊。話說太陽唔知點解突然之間就嚟無燃料，於是一班科學家敢死隊（共八人）帶埋一個超大型氫彈搭乘太空船去太陽引爆，重新提供燃料啟動核融合。只是成員中有人懷有特殊目的，重重陰謀希望令任務失敗......電影有兩樣嘢令人印象極深刻：1.亞洲演員楊紫瓊同真田廣之嘅演出；同埋2.唔知講乜同埋想點嘅結局。

《強戰世界》War of the Worlds (2005)  台灣片名:世界大戰

H.G.Wells經典原著改編，外星人入侵地球試圖殺光地球上所有生物並掠奪資源，一個家庭掙扎求存嘅故事。片中設定一個拋妻棄子喺末日突然悔改嘅衰老豆，揾嚟湯告魯斯做，佢已經出盡力但可能忠嘅形象太烙印，硬係唔多似樣。電影當年獲三項奧斯卡技術獎項提名：視覺效果、音響效果和混音。