|
|
樓主 |
發表於 2015-2-4 10:21:36
|
顯示全部樓層
終於到我 Denon AVR-X7200W 第二集 – 寫真+實試 (完結篇)
作者: 小瑟 20 一月 2015
上集題要 : 上星期同大家分享左 “終於到我 Denon AVR-X7200W 第一集 – 開箱文" 之後, 大家都係科林留言希望可以有更 DETAIL 的分享, 承蒙大家錯愛及支持, 小瑟就特地呢幾日不停咁睇戲聽歌, 希望可以煲一煲部 X7200W等佢入狀態, 亦都借機會好好享受一下久違了十多年前的天龍味道, 其實小瑟係十多年前, 開始搬出來住時的AV AMP就係天龍機, 當年仲好記得同個老友一同到旺角影音(當時仲係女人街口上二樓的年代), 一人一部即買即走咁抬部 AMP 返屋企, 到依家小瑟仲瀝瀝在目, 印象深刻. 上次小瑟試玩 4520一套西裝時, 其實心中都暗暗決定下部AMP一定係天龍架勒, 而去到ATMOS時段, 人人換AMP, 見到有部 AVR-X5200W出世, 價位只係 HKD$15,980, 規格上竟然同上年4520不相上下, 仲要又係 Made in Japan, 心中真係覺得怪怪的, 因為以我估計, 如果係是年旗艦, 價位又點可能萬中就可以埋單呢?? 故此小瑟就一定等等等………..
Denon AVR-X7200W vs Denon AVR-X5200W
好多朋友都問, 究竟 X7200W 同 X5200W既分別係咩呢?? 小瑟就簡單咁了解過二部機既重點分別, 就單聲道輸出功率來說, 7200係 260W而 5200 係240W(6 ohm, 1 kHz, 10% 1ch Drive), 雖然大家都係 9聲道輸出, 但 7200 係 (右左分置單聲道放大器架構) 而 5200 就係 (全新單聲道放大器架構), 7200可以做到自由分配內部放大器功能的, 但 5200 就唔可以了, 而 7200 同 5200 都係同樣支援 Dolby Atmos 同 Auro 3D(需付費網上升級)的, DSP同樣都係四粒, 而D/A轉換器就有分別勒, 7200 係用上七粒 AK-4490 支援 384 kHz / 32 bit, 而 5200 就用上二粒 PCM-1690 支援 192 kHz / 24 bit, 另外係 D.D.S.C. 同 天龍出哂名既 Alpha Processing 都有D分別, 當然最大分別既一定係價錢啦, 7200W賣價 HKD$23,980 而 X5200W就只賣HKD$15,980, 究竟應該選邊部大家就可以自行判斷勒~~~
∇左為 AVR-X7200W , 右為 AVR-X5200W
 
寬衣解帶
上集同大家開完箱之後, 一於今次同大家黎個寬衣解帶, 睇睇究竟呢部2015年天龍的旗艦合併式擴音機又有咩睇頭先. 就咁照上去, AVR-X7200W同上代 AVR-4520一定, 以置中左右放大器式安排, 過去天龍如POA-3000和AVC-A1XV呢類頂級機種都係採用呢種對稱或放大佈局同結構設計, 呢種結構相信係經過天龍多年實證可以確保可以分離及降低相互干擾, 對音色的訊噪減至最低呢. 而 X7200W內置 9 聲道功率放大器, 係唔需要加任何 Power Amp時, 可以提供到 5.1.4 Atmos音效比用家, 另外如果另加 Power Amp的話, 就可以完美地提供 7.2.4 最大11.2 聲道的家庭影院效果……….小瑟都好希望屋企可以玩到, 不過…..~_~!!!!
∇中間一大隻Denon自家火牛, 而上面二條就憬電子集成電路!!
 
 
音效處理晶片
X7200W貴為旗艦, 晶片當然勁抽啦, 用上四粒 SHARC DSP 配置加強處理音效解碼既能力, 而為了優化 Dolby Atmos 的音效, 最新的 D.D.S.C.- HD32 架構上採用左四粒 32 bit DSP , 總運算能力達到 1600 MIPS(精簡指令集), 而AL32多聲道處理, Audysessy MultEQ XT32 Room EQ 和 Denon Link HD 的處理都會用上呢幾粒DSP的, 小瑟大既記得係二粒DSP係用於環繞聲解碼( Dolby Atmos , Dolby True HD , DTS Master MA 等), 而第三粒是用於 AL32 Processing Multi-Channel和 LFE Trim, 第四片就係用於 Post Processing 和 Audysessy MultEQ XT32 Room EQ 處理等等…..
∇另外 X7200W仲有另外七粒 ASAHI KASEI 32 bit DAC AK4490EQ晶片, 設計係獨立電路版來為十三個聲道作D/A轉換, 聽講可以減少 DSP , 網絡及 USB輸送大量數據時所產生的噪音干擾, 咁就可以提升聲道分隔及聲音透明度, 其採樣頻率可以達至384kHz及對應依家極重要的 DSD 11.2 MHz檔案架, 聽落都好似好堅咁呢!!!!
 
機背寫真
∇一個基本的報告又點會冇機背寫真呢, 開完內籠之後, 裝返好佢就同大家影埋個PAT PAT先啦!!! (以下呢要像素特別大小小, 方便大家睇得仔細D呢!!!^^")
∇Wifi 同 藍芽已經成為不可少得連線方式, 佢又點會少呢!!!! 小瑟試過用佢來連返手上既 Sony Z3來聽歌, KKBOX同JOOX既音質真係可以用一句"無所遁形"來形容呢!!
天龍獨家 – Denon Link HD
一個非常之有用獨家工具, Denon Link HD又點會少得, 大家可以見到RCA用上唔同既組件, 一睇就知, 又係靚D既呢, 究竟呢個天龍獨家技術係咩來呢? 當使用返天龍 DBT-3313 藍光機同 AVR-X7200W 以 HDMI 連接之後, 再以一條 75Ω(ohm) 接線將二部以連線, 就可以啟動 Denon Link HD, 呢個功能就係共享 AVR 的主時鐘, 唔好睇少呢個功能, 呢個非常之有效減低 Jitter 產生, 仲可以還原混音時所編錄數據音訊, 從而就可以比到更出色準確既定位同層次感. 不過小瑟暫時未有 Denon DBT-3313UD(因為入左呢部已經大出血了!!!~_~), 所以暫時未可以再進一步提升功力, 而且因為要入手呢部機王關係, 小瑟更加要將 OPPO BDP-105D放售……所以暫時小瑟手上就只剩下 OPPO BDP-103在手頂住引先……真係陰公豬呢!!!@@!!!
∇HDMI共有7入三出咁多個比大家用, 我諗一般都夠哂勒卦!!!!
∇雖然依家話 Made in Japan 已經唔係咁重要, 不過如果買機時比左成二萬幾蚊出黎, 而部機原來仲可以係 MIJ 的話, 呢個 Bonus 都感覺良好架!!!!
Dolby Atmos Enabled Speaker 方案
好勒, 睇完 X7200W 寫真之後, 小瑟當然急不及待地接駁開機先啦, 因為小瑟今次係玩 Dolby Atmos Enabled 方案, 所以整多對喇叭係在所必行, 依家市面上有既 Atmos Enabled 唔多, 要數最強喇叭當然係首選 KEF R50 呢對頂級 AES 啦, 不過小瑟仲食緊樹皮, 所以今次真係只可以問 KEF 借來試玩下先, 多得 KEF 各好友幫助, 小瑟好快就可以借到對 R50 返屋企慢慢試, 係度真係要多謝佢地一聲呢!!!!
∇本來小瑟都有D擔心究竟我用開既 XQ10點樣將隻R50放上去而又唔會跌呢?? 好彩小瑟本身係用釘腳, 所以跟喇叭來既"腳"就一直收埋冇用, 今次終於佢都有用勒!!!
∇只要將佢反轉來擺, 隻 R50 就可以舒舒服服又穩陣地放上 XQ10 既喇叭頂, COOL呀~~~~
 
∇雖然好多人都問小瑟點解仲用 XQ10, 不過其實小瑟一直都想轉 R100 的, 不過換得 R100又點少得 R200C 呢? 係呢個一闊三大的影響下……..都係好忙, 下次先講!XDDDD
∇放隻 R50 上 XQ10 有個好處架, 就係喇叭擺位角度易於安排呀~XDDDDD
∇黎個全家福先!^.^
∇因為小瑟未買 Auro 3D firmware既關係, 所以依家開機依然有個提示, 唔知點解, 我次次答 “ignore" 佢都仲會彈出黎, 唔通要我比左錢先肯放過我!?XDDDD
∇整多個正面相比大家睇下先, 機面蓋開後就會見到好多不同功能鍵, 基本用都還可以, 但如果想進一步調控都係用返 Remote 啦!!
 
∇終於都攪掂哂D基本野, 駁好哂所有接線, 畫面就出現一個導航畫面, 好簡單地只要一步步跟佢做就可以架勒!!!!
∇第二步 X7200W 就會問你係咪已經預備好哂所有必須品呢?
 
∇系統需要先了解用家依家接駁好的喇叭組合會係什麼樣的一個系統, 佢會問你有冇12或13隻喇叭或 10或11隻喇叭, 小瑟不才, 我只有小過 10隻喇叭, 所以就選左 “Less than 10 speakers" 勒!!
 
∇跟住呢步小瑟都覺得幾攪笑, 佢會圖文教埋你點接駁喇叭, 但又有幾多人會未駁好哂線就開機呢?? 當然都會有, 不過我諗小瑟一定唔得呢, 因為我個機背冇多餘位比我咁做呢!!XDDD
 
 
∇過程中系統會問哂你有冇前置, 中置, 後置, 同埋有冇 Atmos 既喇叭呢?? 其實咁都幾好, 起碼我好清楚系統完全了解我喇叭組合係部AMP上係咪一定插岩哂先, 同埋值得一提既係, Denon 既設定介面絕對係咁多個AV AMP品牌中, 數一數二的靚仔呢!!!!!^^"
 
 
 
∇以下就開始問到你有冇玩 Atmos 喇叭, 係玩天花喇叭定係反射喇叭呢?? 如果係反射又有幾多對呢?? 有左呢個圖就絕對清楚冇攪錯啦.
 
∇Yeah, 終於都可以學大家玩 Atmos 勒………(雖然只係玩反射式, 不過最重要係….."可以點到燈麻~^_^“)
 
∇最後所有喇叭設定完之後, 就會得出一個同你屋企既組合一模一樣的圖示, 呢刻大家就睇睇自己既系統同圖中係咪一樣勒, 如果有出入, 記得返入Setup頁再做一次呀! 除左睇圖知道有冇分別之外, X7200W仲會好細心地為你每隻喇叭做個測試, 比一個音樂每一隻喇叭等大家可以回應返系統係咪真係駁好哂, 呢個細心既做法可能會有人覺得好無謂, 不過小瑟就覺得好貼心, 因為唔係下下都聽 Test Tone架麻, 咁樣一試就確保接駁冇哂問題勒!!!
 
自動音效設定
∇硬件設定好哂之後, 當然就黎到軟年設定啦, X7200W就有 Audyssey MultEQ XT32作為房間音頻修正, 係影音業界享譽多年, 用佢來為你既屋企作音場測量絕對專業啦!!!
 
∇大家玩 Auto Setup 時記得用返天龍送果枝腳架呀, 當然你有自己專業攝影腳架都可以, 不過小瑟呢D新屎坑, 點都要香香佢既~^,^
∇自動音場修正原先會以8點測量位作基本測試, 但其實去到4點之後, 已經可以比用家完成測量, 小瑟屋企聆聽環境唔算大, 所以去到第4節就已經足夠了呢!
∇留意一下 Set Mic的高度, 一定要跟返你皇帝位真正耳仔水平之高度先岩架.
∇設定一輪之後, 系統就會作修正, 除左一般的音壓同距離呢D基本野之外, Audyseey MulitEQ XT32 同 Dynamic EQ 都會一同設定妥當, 之後大家就可以反覆試下開/關既聽感, 從而取得最岩你口味既音質, 當然大家都可以進入設定內再逐個喇叭的EQ再自行調校啦. 小瑟玩機慣左先用哂系統 Auto Setup 出來的效果聽一排先, 之後再慢慢逐項作微調呢.
 
∇咪以為咁快攪掂, 系統仲會為你其他的輸入導航大家作設定, 包括網絡收音機同訊源設定.
 
 
 
∇登登登登, 終於都完成哂整個首次設定勒, 好勒, 最後就當然係跟埋佢畫面中所講, Enjoy 啦!!!!^^"
Atmos 首試 – 【變形金剛：殲滅世紀】
第一套試既唔洗講野一定係【變形金剛：殲滅世紀】啦, 呢套片係多次既 Atmos 活動中已經聽到耳熟能詳, 而鋼索呢段絕對係可以試出天空效果, 小瑟首次係屋企可以點燈玩 Atmos 真係非常興奮呀, 雖然只係玩反射喇叭, 而後置喇叭又未可以跟足 Dolby 要求以一耳水平, 但依家呢個 5.1.2 既設定係天空既效果上, 已經非常滿足呢, 小瑟專登開得大聲D去感受"戰機過頭"果下, Wow wow wow, 小瑟真係感覺到戰機快速到由右上飛去頭頂再向後飛走, 而鋼索斷列時聽到天花位會有一下好微弱既"燈"聲向下"拍"埋黎, 果一刻小瑟真係腎上腺素標升, 好感動呀!!!!@@"
之後再講講 X7200W 比小瑟既感覺係"快", 同 “狼", 大家都可能認為天龍係 “打心口", “拳拳到肉", 但小瑟反而認為佢注重左三頻既平衡度, 高音位Sharp得來唔會吉耳仔, 中音人聲對白厚度岩岩好, 唔會太濛亦唔炒耳, 亦都因為咁樣, X7200W 既定位感非常充實, 不過有一點需要留意既係, 如果跟足自動音場設定既話, 小瑟覺得 Sub仔壓迫感唔係好夠皮, 太淡口唔夠迫力, 所以小瑟自己就係隻 Sub 仔背上的音壓位輕輕加大左2db, 戲院感同包圍感即時提升二個碼, 冇計, 小瑟雖未算低音狂, 不過都非常享受比 Sub 仔力壓既感覺.
∇如果大家想睇緊戲時, 想選擇一下音效, 可以按 X7200W 既 Remote 中的下方的四粒顏色鍵的 “Movie", 就可以自由選擇.
 
Atmos 必試 – 【忍者龜：變種新任務】
好多朋友一聽到呢套戲, 就會話好爛喎, 唔掂喎, 故事既野就見仁見智勒, 不過小瑟都可以睇哂成套, 當然7成係因為 Megan Fox 既關係啦, 不過外國人真係唔襟老, Megan Fox都唔係好老之麻, 唔知點解個樣好似變左咁, 真係陰公……… 不過小瑟唔係想同大家講 Megan Fox 點變法, 而係呢套有 Atmos 音效【忍者龜：變種新任務】有一段真係用來試 Atmos 正到喊出黎的呢, 就係呢段貨櫃車沖落山一段勒, 話說佢地幾隻野逃走左之後, 搵到架貨櫃車, 咁都係果D追追逐逐咁啦, 但過程中除左打到飛起果D例牌飛來飛去的試機位之外, 最正絕對係幾隻忍者龜係架貨櫃車底來來回回, 閃來閃去, 左閃右避既場口, 因為佢地幾個係車底, 所以呢個時候既天花同後置喇叭就震過不停, 貨櫃由天花右飛去左, 再左飛去右, 感覺就真係好似有成卡貨櫃係小瑟屋企咁, 第一野真係要"縮"頭先掂, 嚇得我呢…….^.^" 如果大家都有呢套藍光係手, 應該都會明白小瑟感覺到既野呢!!!!
Atmos升頻
相信好多朋友都會問 : 我依家成手碟都冇 Atmos 架喎, 點算先?? 冇問題啦, Atmos 升頻都可以止下咳先啦, 當你睇緊 DTS-HDMA 或 Dolby TureHD時, 只需要係 X7000W的 Remote中按下 “Movie" 鍵, 就會出現以下選單, 選 “DTS-HD + Dolby Surround" 呢個模式, 就可以為你欣賞中既電影作出升頻架勒.
結語
其實呢個小報告對好多已經玩緊 Atmos 既朋友來講, 絕對係幼稚園級數, 只玩反射喇叭, 仲要玩 5.1 系統, 後置喇叭又唔係人耳水平, 跟依家玩影音的潮流來說絕對係唔夠班, 未入流之輩, 不過香港地玩影音就係環境鬥士來, 我們往往都要係好多不可能的情況下做到"可能", 就以小瑟當日睇到 Dolby Atmos 出台時, 已經心中暗知出事, 7.1.4, 11隻喇叭?? 唔好玩啦, 小瑟只係梳化後玩四隻後置都未做到, 仲話掛天花喇叭?? 呢個行為絕對係"索尼罪大惡極"啦, 得到中央通過的可能性近乎零…….~_~ 不過好彩 Dolby仲出多個 Enabled Speaker 方案, 以反射方法模擬返個天花喇叭, 都叫做有返小小安慰. 而小瑟以 Denon X7200W 作為自己家庭影院之"大腦"系統, 無非都係比佢 “強悍得來唔霸道, 幼細得來唔吉耳" 所吸引, 不過上年試過 Denon Link HD 一套西裝果份穩定而大流量的傳真性之後, 就知道下一步入手埋佢既藍光機已經係冇得選擇既一步, 所以小瑟係度真係奉勸各位, 毒海無涯, 回頭是岸呀!!!!
|
|
狗仔卡
發表於 2015-2-4 10:21:08
提升卡
沉默卡
喧囂卡
變色卡
發表於 2015-2-4 10:57:52
發表於 2015-2-7 19:34:44
